"Фестываль этнакультурных традыцый "Кліч Палесся" пройдзе восьмы раз. У 2010 годзе фестываль сабраў амаль 5,5 тыс. наведвальнікаў. У 2020 годзе было ўжо 15 тыс. наведвальнікаў, а ў 2022-м - каля 40 тыс. У гэтым годзе мы чакаем яшчэ большы наплыў турыстаў", - сказаў Андрэй Бяспалы.
Паводле яго слоў, фестываль паспеў ужо стаць брэндам Нацыянальнага парку "Прыпяцкі" і ў цэлым Палесся. Мэта правядзення фестывалю - захаванне, перадача традыцый і звычаяў палешукоў. "У бягучым годзе будуць удзельнічаць больш за 10 раёнаў Брэсцкай і Гомельскай абласцей. На кожны раён выдзелена месца для арганізацыі падворкаў. На пляцоўках будуць працаваць фуд-корты з традыцыйнымі пачастункамі і выступяць калектывы народнай творчасці. Тут можна будзе акунуцца ў побыт і традыцыі нашых продкаў", - падкрэсліў намеснік гендырэктара.
Асобна будуць арганізаваны выставы і майстар-класы рамеснікаў і майстроў народнай творчасці па ганчарнай і кавальскай справе, ткацтве і саломапляценні. Цяпер праходзіць семінар-пленэр "Ажыўшая даўніна", у рамках якога 10 майстроў разьбы па дрэве вырабляюць фігуры з дуба. Тэматыка - побыт палешукоў. Да 10 жніўня прымаюцца работы, а на самім фестывалі іх прадэманструюць. Традыцыйна правядуць конкурс прыгажосці і грацыі "Палеская прыгажуня". На трох пляцоўках будуць выступаць калектывы народнай творчасці, а на галоўнай сцэне адбудзецца кавер-хор-шоу, на якім, акрамя калектываў народнай творчасці, будуць выступаць эстрадныя спевакі.
"У мінулым годзе гасцям фестывалю вельмі спадабаўся "ЭтнаЗааФэст", таму ў бягучым годзе арганізуем яго зноў. Гэта кантактны міні-заапарк, куды любы жадаючы зможа прыйсці і сфатаграфавацца са свойскімі жывёламі", - дадаў Андрэй Бяспалы.
На фестывалі таксама арганізуюць інтэрактыўныя пляцоўкі "Беларусь старажытная", "Палявы кінатэатр", выставы "Паляванне і рыбалоўства", "Турыстычнае Палессе" і "Палеская рыбалка", на якой, дарэчы, будзе арганізаваны конкурс, пераможцаў чакаюць добрыя прызы. "Акрамя іншага, будзе магчымасць пакатацца на цеплаходзе і маторных лодках, наведаць сафары-парк і музей прыроды Нацыянальнага парку "Прыпяцкі". Асобна пройдзе фестываль "Хлеб майго Палесся", дзе кожны жадаючы зможа паўдзельнічаць у працэсе выпечкі хлеба або набыць гатовы выраб", - звярнуў увагу Андрэй Бяспалы.
Гасцінічныя нумары на час фестывалю ўжо даўно забраніраваны, але арганізатары прадугледзелі кемпінг, дзе ўсе жадаючыя змогуць размясціцца.
Фестываль пройдзе 17 жніўня. Пляцоўкі будуць працаваць з 11.00 да 22.00, а гала-канцэрт прадоўжыцца да 23.00. Мерапрыемства завершыцца святочным феерверкам.
