Як адзначыў начальнік упраўлення спорту і турызму Гомельскага аблвыканкама Павел Старасвецкі, для падрыхтоўкі спартсменаў у рэспубліцы, на ўзроўні рэгіёна выбудавана комплексная сістэма. "Усе ўмовы створаны для дасягнення вынікаў", - падкрэсліў ён.
Так, сярэбраным прызёрам чэмпіянату свету U23, які прайшоў у сталіцы Албаніі Тыране, у вагавой катэгорыі да 63 кг стаў Глеб Макаранка. "Да першынства рыхтаваліся як трэба - дывановыя работы, работа над моцнымі бакамі, умацаванне слабых, работа над памылкамі ў ранейшых выступленнях", - расказаў аб падрыхтоўчым этапе барэц.
Паводле слоў спартсмена, само выступленне на чэмпіянаце не было з разраду лёгкіх. "У першай схватцы ледзь вырваў перамогу - сапернікі моцныя, плюс, напэўна, адчуваўся той вымушаны перапынак, калі нас не пускалі на міжнародныя старты. Але вярнуўшыся, мы набіраем абароты", - адзначыў барэц.
Ён звярнуў увагу, што барацьба ўсё больш набірае папулярнасць - і ў Еўропе, і ў Азіі. "Асабліва ў малых вагах. Канкурэнцыя вельмі сур'ёзная. Слабых сапернікаў няма", - падкрэсліў Глеб Макаранка.
"Вядома, ёсць пэўная доля шанцавання, але ў асноўным вынік - гэта работа, упартасць, характар", - дадаў ён.
У планах спартсмена на бліжэйшы час - заваяванне ліцэнзіі на Алімпійскія гульні і самі АІ.
Бронзавым прызёрам чэмпіянату ў вагавой катэгорыі да 55 кг стала Арына Мартынава. "Выступіла не супер, але дастойна. Так, былі памылкі, трэба над імі папрацаваць", - дала ацэнку спартсменка.
Тонкасці барацьбы яна спасцігае ўжо каля 13 гадоў. "Пачала займацца з 7 гадоў. Прыйшла на трэніроўку - і зацягнула. Цяпер спорт - маё жыццё", - прызналася яна.
Словы ўдзячнасці за выступленні і падарункі ў гэты дзень атрымалі таксама Надзея Буланая і Іван Грамыка, якія занялі пятыя радкі ў спаборніцкім рэйтынгу ў сваіх катэгорыях. "У барацьбе нават трапіць на спаборніцтвы такога маштабу - поспех. Сёння гэта можа быць пятае месца, а заўтра першае ўжо", - зрабіў акцэнт Павел Старасвецкі.
Начальнік упраўлення спорту і турызму адзначыў вялікі ўклад у падрыхтоўку спартсменаў трэнераў - Сяргея Смаля, Яўгена Герасіменкі, Вячаслава Макаранкі, Генадзя Грома. "Гомельская школа давала і дае вынікі на працягу доўгага часу. І сённяшнія хлопцы, дзяўчаты таксама дастойна выступаюць, хочуць рэалізаваць свае магчымасці, зараджаны на вынік", - сказаў Сяргей Смаль.
Прыемныя сюрпрызы спартсменам, трэнерам падрыхтавалі Гомельская абласная федэрацыя барацьбы, партнёры федэрацыі.
Павел Старасвецкі падзякаваў спартсменам і за выступленне на ІІ Гульнях краін СНД. "Фармат, якасць правядзення спаборніцтва чарговы раз даказалі: у нашай краіне арганізуюць спаборніцтвы любога маштабу на вышэйшым узроўні. Самая галоўная ацэнка - ад удзельнікаў - вельмі высокая", - рэзюмаваў ён.
