Беларуская дэлегацыя на чале са старшынёй Савета Рэспублікі Наталляй Качанавай з афіцыйным візітам знаходзіцца ва Узбекістане. У гэтыя дні ў Ташкенце праходзіць ІІ Узбекска-беларускі жаночы бізнес-форум. Ад беларускага боку ў ім прымаюць удзел амаль 100 прадстаўнікоў бізнес-супольнасці і дзяржаўных органаў. У першы дзень форуму былі арганізаваны шэсць тэматычных секцый зыходзячы з асноўных напрамкаў супрацоўніцтва Беларусі і Узбекістана - машынабудаванне, лёгкая прамысловасць, сельская гаспадарка, хімія і дрэваапрацоўка, медыцынскія і адукацыйныя паслугі, турызм. 27 жніўня адбылося пленарнае пасяджэнне.
"Абмеркавалі шырокае кола пытанняў двухбаковага парадку дня. Гэта не толькі міжпарламенцкае ўзаемадзеянне ў чыстым выглядзе, гэта пытанні гандлёва-эканамічнага супрацоўніцтва, узаемадзеяння ў сацыяльна-гуманітарнай сферы, у галіне адукацыі, аховы здароўя, турызму. Мы дамовіліся аб павышэнні ўзроўню нашага міжпарламенцкага ўзаемадзеяння", - сказаў Сяргей Алейнік.
"Парламенцкай камісіяй з боку Узбекістана ўнесены прапановы, каб можна было сустракацца два разы на год і абмяркоўваць пытанні, якія датычацца нашага ўзаемадзеяння па развіцці інтэграцыі, укладанні інвестыцый па тым ці іншым напрамку, каб павялічыць тавараабарот паміж нашымі краінамі, - дадаў старшыня Пастаяннай камісіі па рэгіянальнай палітыцы і мясцовым самакіраванні Савета Рэспублікі Леанід Заяц. - Мы павінны кааперавацца, укладвацца менавіта ў тыя напрамкі, якія цікавыя для Узбекістана і Беларусі. Магчыма, нашым сумесным прадуктам мы будзем выходзіць за межы краін СНД".
У час пленарнага пасяджэння ІІ Узбекска-беларускага жаночага бізнес-форуму падпісаны дакументы аб супрацоўніцтве. У прыватнасці, падпісаны кантракты на выкананне паслуг па пашыве вырабаў паміж ААТ "Камволь" і Dilfuza Dizayn, на пастаўку арселонавай ніткі паміж ААТ "СветлагорскХімвалакно" і ТАА Apiteks, паміж ТАА "Кіруючая кампанія холдынга "Беларуская гарбарна-абутковая кампанія "Марко" і ТАА Premium сapital group, на пастаўку тканін паміж ААТ "Камволь" і Len patrokl, на пастаўку трыкатажнага палатна паміж ААТ "Купалінка" і Class Tex Production, на пастаўку кандытарскіх вырабаў паміж ААТ "Чырвоны харчавік" і ТАА Divider-metall, а таксама падпісана дарожная карта па пашырэнні практычнага супрацоўніцтва ў сферы аховы здароўя маці і дзіцяці на 2024-2026 гады паміж Мінскім гарадскім выканаўчым камітэтам і Хакіміятам горада Ташкента.
